Ditën e sotme, lajmi për ndarjen nga jeta të këngëtarit të njohur Shpat Kasapi ka tronditur publikun shqiptar dhe komunitetin artistik. Vdekja e tij e papritur ka hapur shumë pikëpyetje, ndërsa familja ka dhënë deklaratat e para të mbushura me dhimbje dhe pasiguri.

Vëllai i artistit, Albini, ka folur për mediat duke treguar se Shpati nuk gjendej në Shqipëri në momentin e ngjarjes, por në Itali, ku kishte shkuar së bashku me bashkëshorten dhe djalin e tyre 4-vjeçar. Sipas tij, arsyeja e udhëtimit kishte qenë krejtësisht familjare:

“Shpati ishte në Itali për një kontroll mjekësor të djalit. Asgjë nuk paralajmëronte tragjedinë. Ndihma e parë iu dha në banesë, por fatkeqësisht gjithçka ndodhi shumë shpejt.”

Albini tregon se familja është e tronditur dhe se ende nuk kanë marrë një përgjigje të qartë nga mjekët italianë në lidhje me shkakun e vdekjes. Megjithatë, ai shton se ekziston një dyshim i fortë për një problem kardiak:

“Dyshojmë për arrest kardiak. Shpati kishte herë pas here shqetësime të vogla nga zemra, por asgjë serioze, asgjë që të na bënte të mendojmë se mund të humbnim kaq papritur.”

Në pritje të raporteve zyrtare mjekësore, familja kërkon privatësi dhe qetësi, ndërsa fansat e artistit vazhdojnë të shprehin ngushëllimet e tyre në rrjetet sociale.